2024-жылдын 18-декабрында Жогорку соттун кылмыш иштери боюнча соттук коллегиясы Камчы Көлбаевдин жарандык жубайы Тентешова Нурия Жумакадыровнага карата чыгарылган өкүмгө өзгөртүү киргизди.
Соттук коллегиянын төрагасы А. Сыдыков, судьялар С. Атакулов жана Д. Назаров катышкан отурумда буга чейинки соттук актылар жарым-жартылай өзгөртүлүп, Нурия Тентешовага карата жаза мөөнөтү 8 жылдан 7 жылга чейин кыскартылды.
Белгилей кетсек, Бишкектин Октябрь райондук соту 2024-жылдын 8-августунда, ал эми Бишкек шаардык сотунун кылмыш жана жоруктар боюнча соттук коллегиясы 26-сентябрда Тентешова жана Көлбаевдин апасы Алиева Майя Сайткуловнага карата өкүм чыгарган.
Жогорку соттун чечимине ылайык, Тентешова Кыргыз Республикасынын Кылмыш-жаза кодексинин 183-беренесинин 3-бөлүгүнүн 2-пункту (1997-жылдагы редакция) боюнча күнөөлүү деп табылып, 7 жылга эркинен ажыратылды. Ал издөөдө деп жарыяланды жана кармалган учурдан тартып камакка алынат. Андан кийин жаза мөөнөтүн өтөө үчүн тиешелүү түзөтүү мекемесине жөнөтүлөт. Анын издөө иштерин жүргүзүү Улуттук коопсуздук боюнча мамлекеттик комитеттин (УКМК) Чүй облусундагы башкармалыгына жүктөлдү.
Ошондой эле, сот коллегиясы адвокаттар Канат Асанкадыр жана М. Жумашев тарабынан берилген кассациялык даттанууларды канааттандырган жок.
