Вашингтон, АКШ – АКШнын президенти Дональд Трамп өлкө болжол менен 5 миллион долларга жаңы «алтын карталарды» сатууну пландап жатканын жарыялады. Бул карталар чет элдик жарандарга Америка Кошмо Штаттарында жашап, иштөөгө жана жарандык алууга мүмкүнчүлүк берет.
Трамп бул тууралуу Ак үйдүн Оваль кабинетинде өткөн жолугушуу учурунда билдирди. Анын айтымында, жаңы демилге АКШнын экономикасына бай инвесторлорду тартууга багытталган.
«Бул картанын баасын 5 миллион доллардын тегерегинде белгилейбиз. Ал грин-картанын артыкчылыктарын берип, жарандык алууга мүмкүндүк түзөт. Бай адамдар биздин өлкөгө келип, бул картаны сатып ала алышат», – деди Трамп.
АКШнын соода министри Говард Латник «алтын карта» учурда иштеп жаткан EB-5 инвестициялык виза программасын алмаштырарын билдирди.
«Албетте, алар (картаны сатып алуучулар – ред.) тиешелүү текшерүүдөн өтүүгө тийиш», – деп кошумчалады Латник.
Трамптын айтымында, бул карталарды сатууну баштоо болжол менен эки жуманын ичинде пландалууда.
Жолугушуу учурунда журналисттер мурдагы президенттен «Бул карталарды орус олигархтарына сатуу мүмкүнчүлүгүн карап жатасызбы?» деп сурашканда, ал: «Ооба, мүмкүн. Мен айрым орус олигархтарын билем — абдан жагымдуу адамдар», – деп жооп берди.
Жаңы программа АКШнын иммиграциялык саясатына чоң өзгөртүү алып келиши мүмкүн. Бирок бул демилге Конгресстин жана коомчулуктун кандай реакциясын жаратаары азырынча белгисиз.
