Кыргызстанда блогерлерге Креативдүү индустриялар паркына (КИП) резидент болуу мүмкүнчүлүгү түзүлдү. Бул тууралуу Мамлекеттик салык кызматы билдирүү таратты.
Мекеменин маалыматына ылайык, КИПтин резиденти болгон блогерлер эки түрдүү салыктык режимдин бирин тандай алышат: жалпы же атайын.
Эгерде блогерлер жалпы салыктык режимди тандаса, анда алар жалданма кызматкерлеринин айлыктарынан 5% киреше салыгын төлөшөт. Ал эми бул парктын резиденти эмес ишкерлер үчүн бул көрсөткүч 10% түзөт. Ошондой эле алар өздөрү үчүн 15 жылдык мөөнөткө камсыздандыруу төлөмдөрүнөн бошотулат.
Ал эми атайын салыктык режимди тандагандар, башкача айтканда, бирдиктүү салык негизиндеги жөнөкөйлөштүрүлгөн системаны колдонгондор, 2027-жылга чейин кирешесинин 1% өлчөмүндө салык төлөшөт. 2027-жылдан тарта бул көрсөткүч 2% болот. Ошондой эле жалданма кызматкерлеринин кирешесинен 5% киреше салыгын төлөшөт жана 15 жыл бою камсыздандыруу төлөмдөрүнөн бошотулат.
«Салык төлөө – ар бир жарандын милдети»
Мамлекеттик салык кызматынын башчысы бул жаңы механизм салык маданиятын жогорулатууга өбөлгө түзөрүн белгиледи.
«Бул абдан ыңгайлуу шарттар. Биз жарандарга салык маданиятын үйрөтүп, ар бир адам өз айылы, шаары, мамлекетинин өнүгүүсүнө жоопкер экенин түшүнүшү керек. Ошондуктан, бирөөнү толугу менен салыктан бошотуу туура эмес саясат. Мына ушул үчүн салыктык жөнгө салуу иштелип чыккан», – деди ал.
Анын айтымында, блогинг Кыргызстанда жаңыдан өнүгүп келе жаткан тармак болгондуктан, ашыкча салык жүгүн жүктөбөө маанилүү.
Казакстан менен Россиядагы блогерлердин салыгы
Кыргызстандагы блогерлер рыногу Казакстан же Россияга салыштырмалуу кыйла кичинекей.
Казакстанда Мамлекеттик кирешелер комитети 594 блогерге жалпы 53,3 миллиард теңгеге (10 миллиард сомдон ашык) жеткен салыктык карызы тууралуу билдирүү жөнөткөн.
Ал эми Россияда салык маселелерине байланышкан бир катар чуулгандуу окуялар катталган. Маселен, «Каалоолор марафону» долбоорунун автору Елена Блиновская миллиондогон салык карызы үчүн соттолуп, прокурор ага 6 жылдык мөөнөт сураган. Ошондой эле блогерлер Валерия жана Артем Чекаленко салыктарды жашырганы үчүн үй камагына алынган.
Кыргызстанда блогерлердин расмий түрдө салык төлөп, ишмердүүлүгүн жүргүзүүсү үчүн жеңилдиктер каралууда. Креативдүү индустриялар паркы блогерлерге узак мөөнөттүү камсыздандыруу төлөмдөрүнөн бошотуу жана төмөндөтүлгөн салык чендерин сунуштап, бул тармактын өнүгүшүнө өбөлгө түзүүдө. Бирок Кыргызстанда блогерлерге салыктар жумшартылганы менен, коңшу өлкөлөрдө аларга көзөмөл күчөп жатканы байкалууда.
