Стамбул, Түркия – АКШ менен Россиянын делегациялары эки өлкөнүн дипломатиялык өкүлчүлүктөрүнүн ишмердүүлүгүн калыбына келтирүү маселесин талкуулоо үчүн жолугушту. Бул тууралуу «КоммерсантЪ» басылмасы маалымдады.
Жолугушуу Босфор жээгинде, АКШнын башкы консулунун Арнавуткей районундагы резиденциясында өтүп жатат. Тараптар дипломатиялык кызматкерлердин санын көбөйтүү, виза берүү маселелерин жөнгө салуу жана дипломаттардын банктык операцияларын калыбына келтирүү сыяктуу негизги темаларды талкуулашууда.
Буга чейин Москва менен Вашингтон ортосунда эки техникалык жолугушуу өткөн. Ал эми 18-февралда Сауд Аравиясынын борбору Эр-Риядда болгон сүйлөшүүлөрдө дипломатиялык миссиялардын кызматкерлеринин санын көбөйтүү жана элчилерди кайра дайындоо боюнча макулдашуу жетишилген.
АКШнын Россиядагы дипломатиялык өкүлчүлүктөрүнүн ишмердүүлүгү акыркы жылдары кыйла кыскарган. 2021-жылы президент Владимир Путин АКШны “достук эмес өлкөлөрдүн” тизмесине киргизгенден кийин, Вашингтондун дипломаттары Орусиядан чыгарыла баштаган. Ал эми 2022–2023-жылдары дагы ондогон орус дипломаттары АКШдан чыгып кетүүгө мажбур болгон.
Тараптардын азыркы сүйлөшүүлөрү дипломатиялык мамилелерди турукташтырууга карай маанилүү кадам катары бааланууда. Бирок бул жараян кандай жыйынтык берери азырынча белгисиз.
