БИШКЕК, 25-февраль. ЖМКнын ишмердүүлүгүн токтотуу же жабуу чечимин сот гана кабыл ала алат. Бул тууралуу 25-февралда юстиция министринин орун басары Орозбек Сыдыков билдирди.

Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитети учурда ЖМК тууралуу жаңы мыйзам долбоорун карап жатат.

Депутат Гули Кожокулова («Бүтүн Кыргызстан») Маданият, маалымат, спорт жана жаштар саясаты министрлиги жазалоочу орган болбошу керектигин белгиледи.

«Министрлик жөн гана корутунду чыгарууга укуктуу. Ал маалыматтын мамлекеттик саясатка туура келерин же келбесин аныктай алат. Бирок жазалоочу орган болбошу керек. Ар бир мекеме өз иши менен алектениши зарыл», – деди Кожокулова.

Министрдин орун басары Марат Тагаевдин айтымында, мекеме ЖМК боюнча чечим кабыл албайт, ал жөн гана эскертүү берет.

«Эгерде мыйзам бузулса, биз тиешелүү эскертүү беребиз. Бирок акыркы чечимди сот чыгарат», – деди Тагаев.

Юстиция министрлигинин өкүлү Орозбек Сыдыков Маданият министрлиги негизинен мониторинг жүргүзүү функциясын аткарарын кошумчалады.

«Эскертүү берүү маселесин дагы кайра карап чыгуу керек. Маданият министрлиги жөн гана корутунду бериш керек, ал эми чечимди башка органдар кабыл алышы зарыл», – деди Кожокулова.

Сыдыков мыйзамда бир нече негизги пункт каралганын белгиледи.

«Эгерде маалыматта кемсинтүү же жалаа жабуу фактысы аныкталса, анда иш Административдик кодекс боюнча каралат. Эгерде бийликти күч менен басып алууга чакырык болсо, анда ал Кылмыш-жаза кодекске ылайык каралат. Мындай учурларда тиешелүү органдар чара көрүшү керек», – деди ал.

Депутат Кожокулова мыйзам долбоорунда «тиешелүү мамлекеттик органдар» деген түшүнүктү тактоо керектигин сунуштады.