Бишкек шаарында мурда мыйзамсыз жол менен жеке менчикке чыгарылган бала бакчанын имараты мамлекеттин менчигине кайтарылды. Бул тууралуу Улуттук коопсуздук мамлекеттик комитети (УКМК) маалымдады.
Маалыматка ылайык, бул бала бакча комплекси Октябрдын 40 жылдыгы атындагы тигүү фабрикасы – «Айгүл» акционердик коомунун балансында турган. Бирок ал социалдык объектилерди менчиктештирүүгө тыюу салган мыйзамдарды бузуу менен жеке жактарга сатылып кеткен.
УКМК жүргүзгөн иш-чаралардын негизинде объекттин менчик ээлери бул мүлктү мыйзамсыз ээлик кылып жатканын түшүнүшүп, аны ыктыярдуу түрдө мамлекетке кайтарып беришти.
Кайтарылган бала бакчанын өзгөчөлүктөрү:
Дареги: Бишкек шаары, Гоголь көч., 127а
Жалпы аянты: 0,65 га
Имараттын аянты: 1810 чарчы метр
Курулуш көлөмү: 2 кабат
Кубаттуулугу: 280 орун
Бишкек шаарындагы мектепке чейинки билим берүү мекемелеринин жетишсиздигин эске алуу менен, аталган объект шаар мэриясынын карамагына өткөрүлүп, кайрадан бала бакча катары пайдалануу үчүн реконструкцияланат.
УКМК мыйзамсыз менчиктештирилген мамлекеттик мүлктөрдү кайтаруу боюнча иштерди уланта берерин билдирди.
