Нью-Йорк, БУУ. Бириккен Улуттар Уюмунун (БУУ) Коопсуздук Кеңеши Украинадагы согушту тез арада токтотууга жана узак мөөнөттүү тынчтык орнотууга чакырган резолюцияны кабыл алды. Документ нейтралдуу тилде жазылып, анда Россияга карата айыптоолор жок.
Резолюцияны кабыл алуу үчүн кеминде тогуз өлкөнүн колдоосу жана туруктуу мүчөлөрдүн вето койбошу талап кылынган. Добуш берүүдө 10 мамлекет «макул» деп добуш берди: Россия, АКШ, Кытай, Алжир, Гайана, Сьерра-Леоне, Түштүк Корея, Пакистан, Панама жана Сомали. Ал эми Улуу Британия, Франция, Греция, Словения жана Дания добуш берүүдөн карманышты.
Резолюция эки негизги бөлүктөн турат:
Преамбуласында Украинадагы согушта курман болгондорго көңүл айтылып,
Негизги бөлүгүндө конфликтти тез арада токтотууга жана туруктуу тынчтык орнотууга чакырык ташталган.
Генералдык Ассамблеянын позициясы катуураак
Коопсуздук Кеңешинин бул чечимине чейин БУУнун Генералдык Ассамблеясы Украина боюнча эки резолюцияны кабыл алган. Биринчи документти Украина жана Европанын бир катар өлкөлөрү демилгелеп, анда Россиянын согуштук аракеттери бүткүл дүйнөгө коркунуч жаратып жатканы белгиленген. Ошондой эле, Украина мамлекетинин көз карандысыздыгы жана аймактык бүтүндүгү корголушу керек экени, эл аралык мыйзамдарды бузгандар жазага тартылышы зарылдыгы айтылган. Аталган резолюцияны 93 мамлекет колдосо, 18и каршы чыгып, 65 өлкө нейтралдуу калды.
Экинчи резолюцияга Евробиримдик өлкөлөрү өзгөртүүлөрдү киргизип, анда «согушту Россия баштаган» деген эскертүү берилген. Ага 93 мамлекет «макул» деп добуш берди, сегиз өлкө каршы чыкты, ал эми 73 мамлекет добуш берүүдөн карманышты.
Резолюциялардын таасири кандай?
БУУнун Генералдык Ассамблеясынын чечимдери сунуштоо гана мүнөзүнө ээ жана мамлекеттерди милдеттендирбейт. Ал эми Коопсуздук Кеңешинин резолюциялары мүчө мамлекеттер үчүн аткарылышы шарт болгон документ болуп эсептелет.
Бул жолку резолюцияда тараптар согушту токтотууга жана узак мөөнөттүү тынчтыкка жетишүүгө чакырылганы менен, анда кандайдыр бир конкреттүү чаралар же талаптар көрсөтүлгөн эмес. Документтин аткарылышы кандай болору азырынча белгисиз.
