Жалал-Абад облусунда уюшкан кылмыштуу топтун активдүү мүчөсү болгон жаран кармалды. Бул тууралуу Улуттук коопсуздук боюнча мамлекеттик комитеттин (УКМК) басма сөз кызматы билдирди.
Маалыматка ылайык, УКМК жана Жалал-Абад облустук ички иштер башкармалыгынын кызматкерлери биргеликте жүргүзгөн ыкчам-иликтөө иштеринин натыйжасында, 2011-жылдан бери Ички иштер министрлигинин (ИИМ) каттоосунда турган, мурда Ала-Бука районунун “положенец” статусуна ээ болгон, уюшкан кылмыштуу топтун мүчөсү А.А.Н. аттуу жаран кармалды.
Тергөөнүн жүрүшүндө белгилүү болгондой, А.А.Н. 2025-жылдын 11-январынан тарта Россия Федерациясынын аймагында жүрүп, шериктери аркылуу Ала-Бука районунун Өрүктү айылында жайгашкан “Мурас” жана “Мурас 2” азык-түлүк жана курулуш материалдары сатылган дүкөндөрдү өрттөтүүгө буйрук берген. Бул кылмышка А.А.Н. менен дүкөн ээлеринин ортосундагы жеке кастык себеп болгону аныкталды. Өрттүн кесепетинен келтирилген материалдык чыгым 43 миллион сомду түзгөн.
Бул факты боюнча буга чейин дагы бир нече жаран, анын ичинде Ош облусунун тургундары “З.А.Т.”, “К.А.Т.”, “Н.у.У.” жана кылмыштуу топтун активдүү мүчөсү катары ИИМдин каттоосунда турган А.Н.З. аттуу ортомчу кармалган.
Учурда кармалгандар УКМКнын убактылуу кармоочу жайына киргизилип, тергөө жана ыкчам-иликтөө иштери уланууда.
